Gjøsund hamn skal knyte fiskeriklynga, framtida og verda smartare i hop. Med meir verdiskaping, grønare transport og tettare samarbeid skal vi samle tenester og transport for fiskerinæringa på éin stad. I 2025 bygger vi kai, gjer avtalar med sentrale aktørar for drift og avklarer organisering. Derfor blir meir konkrete driftsformer og mål avklart seinare.

Korleis blir Gjøsund ei aktiv fiskerihamn?

Hamna skal tene den aktive fiskerinæringa – ikkje vere ein opplagsplass for eldre fartøy. Tal på liggedøgn er ikkje eit hovudmål. Vi fokuserer på anløpsfrekvens – kor ofte fartøy bruker hamna til lasting, lossing, bunkring og service.

Gjøsund hamn er derfor ikkje eit prosjekt som byggjer på talet på båtar som ligg til kai, men på kor effektivt vi kan gjere fiskerilogistikken.

Kan meir fangst bli landa lokalt?

Ja. I dag landar mange fiskefartøy frå Sunnmøre fangsten i Nord-Norge. Gjøsund hamn skal endre dette. Reiarane i Giske har vore pådrivarar for å styrke lokal landing, og bygginga av fryselager og moderne kaianlegg er første prioritet.

Vi forhandlar med aktuell aktør for frysehus, og har i tillegg dialog med fleire andre aktørar om etableringar i hamna.

Har fiskeriaktørane faktisk forplikta seg?

Ja, fiskeriaktørane i Giske står samla om at første steg er å etablere fryseri og kaianlegg.  Private aktørar har vore sterkt involverte gjennom eigarskap i Gjøsund Utvikling, og det er allereie inngått samarbeid mellom fiskerinæring, industri og logistikkaktørar.

Korleis skil Gjøsund seg frå andre hamner?

Til forskjell frå eksisterande fryseterminalar i Ålesundsområdet er Gjøsund tilpassa fiskeflåten. Her får båtane ein one-stop shop der dei kan lande, fryse, bunkre og gjere service på same stad, noko som reduserer liggetid og aukar innteninga

Kan kommunen bere gjelda?

Ja. Den renteberande gjelda knytt til Gjøsund hamn er i dag ca. 22,2 mill. kr, med påløpte renter og avdrag på ca. 1,2 mill. kr. For 2025 er det budsjettert med investeringar på 37,5 mill. kr, og ei inntekt på 9,5 mill. kr som skal dekke driftskostnadar og nye renter og avdrag. Dette viser ein sunn balanse. I tillegg har kommunen fått statlege midlar til kaibygging.‍

Kommunen eig fleire hundre dekar med utbyggbart industriareal, der marknadsprisen for byggeklart areal er på fleire millionar per dekar. Dette gir betydelege moglegheiter for framtidig inntening.

Kvifor har Giske kommune trekt seg ut av Ålesundsregionens hamnevesen?

Giske kommune ønskte meir lokal styring over utviklinga av Gjøsund hamn. Eit hamnesamarbeid der 95 % av eigarskapen låg utanfor kommunen ga ikkje den fleksibiliteten og næringsutviklinga som var nødvendig for å bygge ei framtidsretta fiskerihamn.

Hamneutvikling er ein prosess som skjer i tett samarbeid med næringa, og derfor tek Giske kommune tettare grep om dette for å sikre raskare utvikling.

Påverkar kvotekutta satsinga?

Kvotekutta påverkar heile næringa, men styrkjer behovet for effektiv logistikk og betre utnytting av fisken. Gjøsund hamn skal derfor vere klar som ei hamn med moderne fasilitetar, og som bidreg til lokal verdiskaping og reduserte driftskostnader for fiskeflåten.

Kan Gjøsund bli ei containerhamn?

Gjøsund hamn skal primært flytte gods frå veg til sjø. RoRo-kai og RoRo-ruter er planlagde, og containerfrakt kan bli aktuelt dersom næringslivet etterspør det. Hamna kjem ikkje til å konkurrere med Ålesund si containerhamn, men komplettere verdikjeda.

Samarbeid er nøkkelen

Gjøsund hamn blir utvikla i tett samarbeid med fiskerinæringa, næringslivet og offentlege instansar, med eit sterkt privat engasjement. Det er fiskerinæringa sine behov som styrer utforminga av hamna. Har du spørsmål?

Interessa frå private aktørar er høg, og sterke industriaktørar viser stor interesse for å etablere seg her.